أهداف التنمية المستدامة مش مجرد تخيل لعالم أفضل إحنا عاوزين نكون فيه ، مش حاجه ممكن تتصنف على إنها احتياج ثانوي بعد الأكل والشرب والحد الأدنى من الدخل .. عشان نكون واقعيين و منقولش كلام شعارات أو ندفن راسنا في الرمل ، احنا لازم نعترف إن نسبة كبيرة من المجتمع المصري بيشوف ان الشخص يروح يتعلم حاجه اسمها ” بناء السلام ” أو يحضر محاضرة بتتكلم عن “طرق مختلفة لمحاربة البطالة ” هو نوع من أنواع الرفاهية ، الجزء ده من ثقافتنا محتاج يتغير .. محتاجين نبقا عارفين إن العالم ده مش هيتغير بالصدفة أو مش هيتغير بناس تانيه غيرنا ” عايشين في عالم وردي ” إحنا اللي بإيدينا نغير أو نستسلم من أول خطوة

عشان كده أهداف التنمية المستدامة هي أسهل طريق ، لأن هي الشيء الوحيد اللي قدر يصيغ كل اللي العالم محتاجه في شكل أجندة واضحة تقدر تخرج منها مبادرات وتحركات مؤثرة بالفعل ، التحرك الفردي نتايجه عشوائية ، الإجتهاد منغير خطة مضيعة للمجهود ، انك تشتغل على خطة محددة وبأرقام واضحة و هدف كبير موجود وبترسمله طريق للوصول ليه هو ده أفضل طريقه للتغيير.

هي مش دعايه لينا بس إحنا حابين نوضح إن ده كان السبب الرئيسي اللي عشانه إتعملت “إدوكواليتي” إحنا في الأساس مش مؤسسه هادفة للربح ، إحنا هدفنا إننا نغير العالم ده لمكان أفضل ونبدأ بمجتمعنا إحنا ، إحنا عارفين كويس ان الموضوع هياخد مجهود كبير ووقت طويل لأن المجتمع المصري مش المجتمع للي بيقبل التغيير بسهولة بس التحدي لازال قائم و ثقتنا لازالت موجوده في إن الشباب المصري هيقدر يعمل حاجه وهيقدر يفهم كويس ان مصر لازم تواكب التحرك العالمي و نكون من الأضلاع الأساسية للعالم في خطة 2030 .. إحنا موجودين ومكملين وبنرحب بأي حد عاوز يصنع تغيير ..ساعدونا بالتفاؤل
0
Comments

Leave a Reply

Your email address will not be published. Required fields are marked *

© 2020 educuality
All Rights Reserved