دليل المواطن الكسلان للحفاظ على الكوكب الغلبان

محاربة الفقر ، القضاء على الجوع ، محاربة العنصرية ، توفير فرص العمل .. كل دي حاجات مهمه جداً للتحول بعالمنا إلى عالم أفضل .. الحاجات دي  – وغيرها – تمت صياغتها عن طريق الأمم المتحدة في حاجه واحده اسمها “أهداف التنمية المستدامة ” ودي أهداف اتحطت عشان العالم يمشي في اتجاهها ولما بنقول العالم ف هنا المقصود حكومات ومؤسسات حكومية و غير حكومية ومنظمات وكل الجهات اللى تقدر تتحمل المسؤولية دي .. فهل ده معناه إن الأفراد ملهمش دور ؟؟ أو إن أنا كفرد أشوف اني فيه جهات شغاله عالموضوع ف أطمن أنا و أقول ” تمام ، انا كده بره الموضوع ” ؟؟

أكيد لاء التغيير بدايته منك انت ، التغيير اللى مطلوب ده هو تغيير على مستوى العالم ، العالم ده دول ثقافاتها مختلفة ، الدول دي ثقافاتها بتتكون من عادات وتقاليد و آراء وشخصية مجتمعاتها ، المجتمعات دي هي مجموعة من الأفراد .. اللى هو انت والناس اللي حواليك .. شفت انت مهم ازاي ؟؟ صدقني انت تقدر تغير حاجات كتير في العالم

طيب نفترض انك شخص كسلان و عايز تريح دماغك بس في نفس الوقت ضميرك بيقوللك انك لازم تشارك في الإتجاه بالعالم ده لعالم أفضل يبقا إيه الحل ؟؟ تخيل إن فيه عادات يومية بسيطة جداً ممكن تخليك تشارك في التحول اللي هيحصل للعالم هنتكلم عنها في المقال ده.

المستوى الأول : حاجات ممكن تغيرها من وانت عالكنبة :

– طبعاً مش محتاج أقولك تطفي النور اللي مش مستخدمه

– جمع حواليك كل الحاجات اللى بتستخدم كهربا موبايلك ، لابتوبك ،  أي حاجه بتتشحن و حطهم كلهم في مشترك واحد و افصله لما متكونش محتاجه أو لما يخلصوا شحن.

-التلفزيون والكمبيوتر والحاجات اللي شغاله في الخلفية كده بس انت مش محتاجها اقفلها

– خليك متابع ، تابع أخبار وتقارير الأمم المتحدة و المنظمات اللي بتشتغل على أهداف التنمية المستدامة ، اتفرج على حملات التوعية اللي بتتم ، كون لنفسك رأي في الموضوع

– لما تشوف بوست بيتكلم عن التحسن أو عن أوضاع سيئه بيتم تعديلها أو بوست بيناهض تصرف معين زي العنصرية أو التحرش أو أي سلوك سيء اعملله شير ، ممكن يشوف البوست بسببك حد ويشارك مشاركة فعالة أو يكون في مستوى أعلى من الكنبة زي ما هنقولك دلوقتي.

المستوى التاني : جوه البيت بس مش عالكنبة:

– لو بتغسل سنانك أو بتاخد دش حاول تفتكر أخوك اللي بيعاني من نقص المياة و اقفل الميه أو قلل الدش مثلاً 3 دقايق بس ، وقول لنفسك ان ال3 دقايق دول مش هيفرقوا معاك بس صدقني هيفرقوا جداً مع حد تاني في مكان تاني ممكن تكون سبب في انه يعيش حياه أفضل.

– لو بتغسل هدومك في الغسالة فيه حاجتين حلوين أوي ممكن تعملهم الأولى انك لو مش مستعجل عليهم سيبهم ينشفوا عادي مش لازم تستخدم مجفف ، التانيه انك تتأكد انك مستخدم الغساله كويس ، يعني حط كل الحاجات اللي عندك محتاجه تتغسل مره واحده ، لو قدرت توفر دورين بس غسيل في الأسبوع هتفرق جداً.

– الأكل ، الأكل ، الأكل .. الموضوع ده أنا عارف انه بييجي في بالك كتير بس مبتنفذش ، صدقني الموضوع مهم أوي من أول انك تطلب أكل أو تعمل أكل على قد احتياجك أو على قد العزومة اللي عندك ، حاول دايماً لو بتشتري معلبات أو خضروات أو أي أنواع أكل انك تختار العبوات الأقل كمية عشان تقدر تتحكم في الإستخدام ومترميش كتير .. بلاش ثقافة تسخين الفرن الأول إلا في الوصفات اللي ده ضروري فيها .. شغل الفرن و حط الأكل فيه علطول واطفيه أول ما تخلص .. حاول تقلل استخدام البلاستيك على قد ما تقدر البلاستيك حالياً بقا من أخطر الحاجات على مستقبل الحياه تحت الميه وانت ميرضيكش ان يجي يوم   منعرفش ناكل فيه سمك☹

– لو بتستخدم غسالة أطباق .. ليه بتغسل الطبق الأول بعدين تحطه في الغساله ؟؟ شطفه سريعه ( لو هو محتاج ) وخلاص

– الكبريت أوفر من الولاعه .. صدقني أنا عارف ان شكلها وحش انك تولع سيجاره بالكبريت كده وانت في مكان عام بس يعني عالأقل البوتاجاز في البيت استخدمله كبريت ، أقولك فكره أحسن ما تبطل سجاير و يبقا أحسن ليك كفرد وللعالم ككل ؟؟

– استخدم السخان وقت ما تحتاجه بس ، مش لازم يفضل شغال علطول ، وازبط الثيرموستات بتاعه على درجة حرارة مناسبة في الشتاء وفي الصيف.

– التكييف مش لازم يخليلك الدنيا تلج ، التكييف وظيفته انك تقعد في جو مناسب ..يعني معقول نشغل التكييف و قاعدين متغطيين بالبطاطين ؟!

– حاول بكل ما تقدر تقلل الحاجات اللي بتترمي في الزباله ، ده بيبدأ من وقت ما انت بتشتري ، فكر في احتياجك للشيء ده فعلاً ، فكر في الكمية اللي انت بالفعل محتاجها ، فكر في طريقة تخلصك من الشيء ده و هل يمكن تستخدمه في شيء تاني ؟

المستوى التالت: بره البيت بس في حتتنا:

– عارف انت السوبر ماركت اللي تحت بيتك ده علطول ؟؟ متسيبوش و تروح للماركتز الكبيره اللي اسمها كبير في حين ان الحاجات اللي انت محتاجها موجوده عند عم سيد !! انت عارف انت كده هتعمل ايه ؟؟ هتساعد في تقليل نسب البطالة ، هتقلل استخدام الطاقة اللي العربيات بتستخدمها عشان تنقل بضائع ، هتساعد العالم انه يكون فيه مساواه في الأمل يعني عم سيد الغلبان ده هيبقا عنده أمل ان العالم لسه فيه خير ويطمن على ولاده زي فلان بيه صاحب الهايبر ماركت

– الموضوع بيكون حساس لما بييجي عند ست البيت بس معلش مضطرين نوجهلك الكلام يا ست الكل .. وانتي بتشتري بتبقي نازله مالبيت معاكي ليستة طلبات صح .. ليه الأكياس دي فيها حاجات أكتر ماللي انتي كاتباها أو أكتر ماللي بيتك محتاجها ؟؟ صدقيني نص الحاجات دي بتترمي في الآخر .. ركزي في الليسته بس لو سمحتي .. عالأقل عشان مصروف البيت ومصروف الكوكب !

– القهوه .. بيتك التاني الجميل و عم سعيد اللي بيحس بيك أكتر من أي حد ، قولله يا عم سعيد الحنفيه البايظه دي بتكلفك وتكلفني و تكلف ابني وابنك أكتر مما تتخيل ، صلحها انشالله على حسابي ( وابعتلنا احنا هنحاسبك ) ، وارجعله تاني بليل و هو بيمسح القهوه وقولله كل الميه دي عشان تمسح ؟؟ والصبح وانت رايح شغلك .. قولله ان رش الميه قدام القهوه مش بيجيب زباين ، بالعكس ده بيجيب طينه كتير .. خليك وراه لحد ما يقلل استهلاك الميه أو يقفل القهوه خالص .. متسيبوش.

– اتمشى شويه لو المشوار قريب .. الموضوع مفيد ليك انت كمان مش بس للعالم ، لو ساكن في دور قريب بلاش الأسانسير كل مره .

– لو عندك عربية ف انت بتتحكم في حاجات كتير في المنطقه عندك .. مثلاً شكمان عربيتك بيتحكم في الهوا اللي بتتنفسه انت وجيرانك ، الصوت العالي وانت مشغل الأغنية اللي بتحبها مش الحل الأفضل لو انت عايز تخدم العالم .. غسيل العربية مش لازم يكون كل يوم وبكل الكمية دي من الميه ، كيس صغير كده في العربية بنلم فيه الزباله بدل ما نرميها من الشباك واحنا ماشيين .. ( وبلاش ننادي على صحابنا بالكلاكس .. احنا ناس متحضره )

المستوى الرابع : مستوى الوحش بقا ، ده وانت في الشغل:

– مراتك عاملالك سندوتشات ، بس زمايلك جايبين فطار وشكله حلو صح ؟؟ مترميش بقا الأكل اللي مراتك أو مامتك عملاهولك عشان تتجنب الخناقة ، اديه لحد تاني ياكله و بردو تبقا ريحت دماغك مالخناقة.

– الست من حقها تشتغل ، صدقني ده مش هيقلل فرص الرجاله في الشغل .. المساواه هي الحل ممكن الست يبقا عندها فكره تساعدك بيها في الشغل أحسن من غيرها ، الأفكار مش بتيجي للرجاله بس ، مراتك وأختك وبنتك من حقهم يحققوا أحلامهم وأهدافهم بره المطبخ

– كلام بيني وبينك الرجاله بتعمل حوادث أكتر بكتير أوي من الستات ف غير فكرتك ان الستات مبتعرفش تسوق ، هما بس يمكن أبطأ شويه في رد فعلهم بس صدقني دي نسبه منهم ، وفيه بردو نسبه من الرجاله رد فعلهم بطيء ف في الآخر كلنا زي بعض.

– شركتك جزء كبير من العالم ، التكييفات اللي شغاله والأنوار دي كلها لو ملهاش لازمه قللها

– فيه منصب حساس في شركتك و ماسكه حد انت بتثق فيه جداً و بيريحك من حاجات كتير ، إيه رأيك لو جبت شاب خريج لسه صغير و قعدته جنبه يعلمه و اديته مرتب صغير .. متخيل انت عملت ايه في مستقبل الشاب ده ؟؟ طب تخيل لو تلات أربع مناصب عندك عملت فيهم كده ؟؟

– في البيت وفي الشغل وفي كل حته .. صلح الحنفية اللي بتنقط والسيفون اللي بيسرب و التفاصيل الصغيرة دي عشان صدقني بتفرق جداً جداً.

– قلل الورقيات اللي بتستخدمها ، مش أي ورقه بيضا نشخبط فيها نرميها .. اعمل ورق كده على جنب ممكن تستخدمه تاني أو تكتب على ضهره

–  ايه رأيك في أسبوع العالم كل تلات شهور أو يوم العالم كل أسبوع .. أسبوع كده أو يوم  هنشتغل كلنا بتكييفات أقل وبإضاءه أقل ومصادر طاقه بشكل عام أقل ، هنقلل استخدام الميه ، ويا سلام بقا لو قدرت تخلي الناس تروح ساعتين بدري .. الناس دي هتحبك أوي وأنا هحبك أوي والكوكب هيحبنا أوي.. حتى لو انت مش المدير أو صاحب الشركه ، اقترح عليه ( بس خلي أسلوبك لطيف ليفتكرك بتتريق ويخصملك يومين)

– بدل ما تروح عند الكولدير كل شويه تشرب في الكوبايه البلاستيك وترميها و تيجي تشرب تاني تستخدم واحده تانيه .. خلي معاك واحده اكتب عليها اسمك واستخدمها طول اليوم.

-المنااااااديل في الحماااااااام .. مش هقولك أكتر من كده ، انت عارف وانا عارف.

-التصوير في مراية الحمام مش بيأثر على حاجه اتصوري براحتك.

– النقطه دي مهمه جداً و هتفرق أوي .. اتكلم مع الناس اللي حواليك و معاك في الشغل عن التنمية ، قوللهم انك قريت ان العالم ده فيه ناس بتقول انه هيكون مكان أفضل في 2030 ، قوللهم ان فيه حاجه اسمها أهداف التنمية المستدامة .. قوللهم انك قريت مقال زي ده و عجبك ، قوللهم كام نقطه ماللي انت فاكرهم ، اديهم أمل وصاحبك اللي أنا عارفه اللي هيقولك يا عم انت بتقول ايه بس ، العالم ده عمره ما هيتغير ، البلد دي هتفضل كده ، يعني كيس الزباله بتاعي أنا اللي هيفرق ؟؟ السيجاره دي هتغير العالم للأفضل ؟؟ قولله ان العالم هيتغير لما هو يقدر يقتنع بقدرته عالتغيير حتى لو عالمستوى الشخصي البسيط ده .. اديله أمل ، اديله حافز .. كلنا في الشغل بنحب الحوافز أياً كان معناها.

• 03 March 2019
• educualityadmin
• Uncategorised
•  0 Comments
•  Like