عشان تقدر تقول اننا ماشيين في الإتجاه الصحيح بالإتجاه للعالم ككل نحو عالم أفضل لازم نبدأ التوعية والتطوير على مستوى المجتمعات ، وكمجتمع مصري إحنا مش شبه أي مجتمع تاني إحنا عندنا اللي بيميزنا من طباع وتقاليد وأفكار ومباديء الطباع دي بين مميزات وعيوب تعتبر سمه من سمات المجتمع ، حاجه كده تقدر تقول عليها “شخصية مجتمعنا” ودي عمرها ما هتتغير غير لما إحنا اللى نعوز التغيير ده .. وإحنا شايفين إن مفتاح الحل لكل ده هو التعليم قبل أي  حاجه .. تعالى نقولك إزاي في المقال ده
محتاجين إيه عشان شوارعنا تبقا نضيفة ؟؟
شوية أزايز بلاستيك مرميه على جنب بعدهم بخطوتين القهوه بترش ميه والميكانيكي بيدلق شوية الزيت القدام والمطعم كنس ونضف وزق الزباله على جنب الطريق .. تفتكر الناس دي بتعمل كده ليه ؟؟ هل هما بينتقموا من شارعهم ؟؟ هل هما مش حابين يعيشوا في منطقة نظيفة ؟؟ تفتكر ده دور مين ؟؟ الدوله ولا الشعب ؟؟ سلوك فردي ولا جماعي ؟؟
تخيل لو كل الناس دي اتوجهلها تعليم صح و حملات توعية بمستوى قوي وبشكل أكبر من مجرد كام كلمة في اعلانات فواصل المسلسل .. تخيل كده الناس دي بقت عارفه أضرار المنظر السيء على النفسية ، لو كل الناس دي بقت عارفه كويس إن الشارع دع بتاعهم هم و بيعبر عن ثقافتهم هم، تخيل لما يوصلوا لمستوى الوعي اللي يخليهم يبذلوا مجهود أكبر في الإعتناء بتفاصيل بسيطة جداً في حياتهم اليومية .. تخيل بعدها بسنه واحده بس حال شوارعنا هيكون إزاي ؟؟ الحل في التعليم.
محتاجين إيه عشان يبقا عندنا علاج آدمي ؟؟
“إلحق بسرعة ، إحنا قفلنا بطن المريض ونسيت نص السندوتش بتاعي جوه” طبعاً مش محتاجين نتكلم عن مستوى الخدمات الصحية في مجتمعنا بس احنا متوقعين كل الردود اللي هتقول ان مرتبات الدكاترة في الأماكن الحكومية ضعيفة ، وإن تردي مستوى الخدمات مسؤولية مشتركة ، وإن الضغط كبير أو الأعداد كبيرة ، أو إن فيه حجم فساد ما ، كل الأسباب كلها حتى اللي مقلنهاش حقيقيه وواقعيه ، بس تخيل كده حجم التغيير المباشر اللي هيحصل في الخدمات الصحية والطبية لو حال التعليم اتغير ؟؟ تخيل حجم الرعاية ومستوى الوعي اللي هيقابله المريض من أول عربية الإسعاف لحد ما يخرج من باب المستشفى بصحة أفضل ، منقصدش بس بالتعليم ” كلية الطب ” الموضوع أكبر من كده ، احنا نقصد الوعي بحجم المسؤولية المجتمعية ، النهوض بمستوى التفكير الجماعي لمنطومة كاملة في مستشفى ما ، القضاء على ظواهر زي ” وأنا مالي ” أو ثقافات زي اننا نروح للصيدلية علطول من غير دكتور .. حاجات كتير زي دي موجوده ومش واخدين بالنا منها .. صدقني الحل في التعليم.
محتاجين إيه عشان البنت تقدر تمشي في الشارع وهي مطمنة ؟؟
– لبس البنت هو المشكلة
– هي تلبس اللي هي عايزاه دي حرية شخصية .. انت غض بصرك
– احنا مجتمع محافظ ، الحرية الشخصية ليها حدود

مش ده خالص نوع النقاش اللي احنا محتاجينه .. احنا محتاجين نقاش من نوع تاني .. التعليم هيعمل ايه في ظاهرة التحرش أو بلاش التحرش هيعمل إيه في فكرة ان البنت بتمشي في الشارع ” مش مطمنة” ؟؟
التعليم هيرفع مستوى الوعي عند الناس ، الناس هتبدأ تحس بروح المجتمع كعائلة واحدة ، التعليم هيقدر يعلي وازع الواجب المجتمعي نحو باقي الأفراد في المجتمع ، التعليم هيرفع مستوى الوعي بالحريات والمساحات الشخصية ، الحل في التعليم.

محتاجين إيه عشان محدش يحس إنه منبوذ
عشان الأطفال في الشارع يبطلوا ينادوا على صاحبهم الأسمر بإسم “عثمان” على سبيل الهزار محتاجين توعية ب إيه هي العنصرية أصلاً ؟؟ وإيه هو التنمر ؟؟ وإيه مدى تأثيره السلبي على نفسيات الأفراد ، لو الطفل الصغير اتعلم إنه يحترم حقوق غيره و عرف يفرق بين المساحات المسموح فيها بالهزار والمساحات اللي مش من حقه يتكلم فيها ، وعرف ان مفيش حد أحسن من حد بلونه أو بشكله أو بوظيفته هينتج مجتمع أفراده بيحترموا بعضهم و بيتعاملوا مع بعض بكل ود وده هيخلق روح سلام وألفه بين الأفراد ويقدر ينتقل بمجتمعنا لمستوى من السلام أعلى بكتير .. الحل في التعليم
محتاجين إيه عشان نحقق العدالة
” انت متعرفش انت بتكلم مين ” ؟؟
بمنتهى البساطة احنا لو كلنا اتعلمنا تعليم بيركز على المساواة المجتمعية وبيعرفنا كويس الحقوق والواجبات مش هنحتاج نعرف احنا بنكلم مين لأن كلنا هنكون سواسيه .. الفساد والواسطه والمحسوبية وكل الحاجات دي نقدر نحاربها بالتعليم .. الحل في التعليم.
محتاجين إيه عشان نقضي عالفساد
عشان نقضي عالشغل اللي بيحصل من تحت الترابيزة والشباك اللي بيفتح بعد الساعه 2 عشان حد معين و الورقه اللي بتتكرمش بتسلك كل حاجه ونخلي الكارنيه يرجع يغلب الجنيه محتاجين تعليم يوعي الناس بحقوقها وواجباتها ويعرفهم ان دايرة الفساد هتعود بالضرر أولاً وأخيراُ على أفراد المجتمع نفسه قبل أي حد تاني .. الحل في التعليم.
محتاجين إيه عشان نقضي عالتلوث
الزباله قضية مجتمعات كتير بتعاني منها بس المجتمعات اللي قدرت تتخلص من المشكلة دي هي المجتمعات اللي وصلت لوعي الأفراد بدورهم ، لما كل واحد عرف انها مش بس مشكلة المسؤولين أو العامل المسؤول عن جمعها أو ست البيت ، لما المجتمع ككل عرف ان دي مسؤولية مشتركة قدروا يحلوا المشكلة ، وده كله مش محتاج أكتر من تعليم كويس موجه للجميع .. الحل في التعليم
محتاجين إيه عشان نقضي عالبطالة

 

تخيل ان انهرده فيه مصانع وشركات في مصر بتستورد عمالة من دول أخرى لمجرد انهم ” بيشتغلوا بجد” ! .. احنا عندنا مشكلة حقيقية وهي ان تدني المرتبات بيخلي الشباب مش شايف ان الحل في الشغل .. بيفضل يدور على حلول جانبية عشان يقدر يعيش وبالتالي الكفاءات بتروح في اتجاهات غير مكانها الصحيح وبالتدريج ده بيخلي التعليم مش حاجه في قائمة الأولويات فعشان نقدر نقول اننا بالفعل قللنا نسب البطالة لحد ما نوصل بيها للصفر ، محتاجين يكون فيه مساواه وفرص تعليم عادلة ، وفرص عمل – آدمية – للخريجين الجدد مش بس التركيز على أصحاب الخبرات ، لما نثق في التعليم اللي عندنا هنقدر نعين الخريجين الجدد من غير ما ندور على كفاءات بصعوبة .. الفجوة اللي بين الخريجين وسوق العمل مش هتتحل إلا بالتعليم .. الحل في التعليم
محتاجين إيه عشان نضمن طفولة سوية
الطفل مش بس محتاج تعليم في المدارس .. المسؤولية مسؤولية مشتركة من البيت والمدرسة والشارع ، لو الطفل نشأ على مباديء زي إن ” الكذب غلط ” بس لقا في الشارع كلام عكس الكلام ده للأسف هيصدق الشارع لأن دلوقتي الوضع غير زمان .. الإنسان بيتعلم بالمواقف اللي بيشوفها مش بنصايح نظرية من الأب والأم والمدرس .. محتاجين تعليم حقيقي بيبدأ بالأهل من الأساس و بيوصل لحد الطفل بيعرفه يعني ايه مجتمعات ويعني إيه أخلاقيات ويعني ايه حقوق وواجبات غير واجبات المدرسة .. الحل في التعليم

 

محتاجين إيه عشان يبقا عندنا تعليم محترم
المدرس طلع يجري ورا الطالب بالخرطوم والطالب بعد اليوم الدراسي لم اصحابه وعاوز يتخانق مع المدرس !! مينفعش ندفن راسنا في الرمل أكتر من كده .. عندنا مشكله حقيقيه في التعليم .

 

محتاجين إيه عشان نستحق عالم أفضل

التعليم اللي احنا عمالين نتكلم عنه من أول البوست مش مقصود بيه بس التعليم اللي في المدارس ، إحنا نقصد التعليم ككل .. عملية تنشئة فرد سوي كجزء من مجتمع سوي ، التعليم اللي نقصده هو غرز القيم المجتمعية جوه الإنسان ، روح السلام ، التعاون ، حب الغير ، المساواه في الحقوق والواجبات ، المساعدة ، تكاتف الأفراد بداخل الدوائر من أجل هدف مشترك .. التعليم اللي نقصده مش تعليم بيستهدف فئة عمرية معينة في المدرسة أو الجامعة ، احنا نقصد تعليم ممكن جداً يتوجه لأعمار فوق ال50 أو ال60 ، مادام فرد في المجتمع فهو مقصود .. احنا محتاجين الناس تفهم أهمية التوعية المجتمعية والتعليم الموازي لتعليم المدرسة عشان نقدر نوصل لعالم أفضل فعلاً .. احنا مش عاوزين التعليم أو الحملات التوعويه اللي بتتكلم عن السلام والحقوق والحريات وكل الحاجات دي تتصنف إنها تعليم “على جنب” أو تعليم ” مش مهم أوي ” محتاجين نستوعب أهمية النوع ده من العلم لأنه هو ده بالفعل اللي بيؤدي بالمجتمعات إلى التطور والتقدم.

0
Comments

Leave a Reply

Your email address will not be published. Required fields are marked *

© 2020 educuality
All Rights Reserved