التنمر .. مصطلح انتشر كتير مؤخراً في محاولات نشر ثقافة محاربته لأن تأثيره فعلاً مش بسيط وللأسف مجتمعنا المصري من المجتمعات اللي منتشر فيها التنمر بصوره كبيره ومخيفة جداً .
لتبسيط أثر التنمر ممكن نقول بشكل مبسط جداً ان مش كلنا نفسياتنا زي بعض فيه شخص ممكن يعديلك أي كلمه وشخص تاني لاء ، ممكن شخص انت أهنته بكلمة على سبيل الهزار بس هو مخدهاش بهزار زيك ، ممكن الكلمة اللي انت شايفها بسيطة دي في وقت هو متضايق فيه و حالته النفسيه مش مستحملة أي ضغوط تكون سبب في انه يكتئب .. أخوفك أكتر ؟؟ الشخص ده لو عمل في نفسه حاجه فإنت السبب !! لو الشخص ده طفل صغير و نشأت عنده مشكلة نفسية هتكون إنت السبب ، الشخص ده لو كلمتك خلته يخجل من شيء معين في شكله / لونه/ دينه / مبادئه ، هتكون انت السبب انه يتعامل مع الناس بعد كده بإنطوائية أو خجل باختصار ، انت مش قد ذنب انك تقتل حد لمجرد كلمه انت عايز تقولها من غير ما تكون عارف عواقبها.
الحياة اليومية بضغوطها المختلفة مؤثرة على الكل مش انت بس ، عشان كده حاول تكون لطيف في كلامك ، تعليقاتك ، نصايحك أو ملاحظاتك اللي بتوجهها حتى لو لحد انت بتحبه ، خليك واحد من الناس اللي بتبني السلام في المجتمع المصري.
